Une propueste di cualitât e jere stade preparade di un grup di esperts che a vevin lavorât par mês, metint dongje un test che al leve te direzion juste: afermazion dal dirit di podê doprâ il furlan in ogni situazion; la presince di un orghin tecnic responsabil de politiche linguistiche regjonâl (ARLeF) che al varès vût di lavorâ cun serietât e continuitât; une scuele metude finalmentri tes condizions di podê dâ une istruzion plurilengâl ai nestris students, come che za e previôt la Leç statâl 482/99... E la liste des riformis positivis e varès podût lâ indevant inmò.

Invezit NO! Parcè che la Zonte Illy e à fat capî che chestis robis lis judiche “masse” pe nestre lenghe, e e à decidût di butâ par aiar il lavôr di mês e mês di int che e lavore di agns a pro de lenghe furlane, e di intervignî in maniere pesante sul test!
Noaltris operadôrs dai sportei linguistics o vin confrontât i doi tescj e si sin rindûts cont che, se ta chescj agns a jerin stâts fats tancj pas indevant, cun cheste gnove propueste di leç il Friûl al fasarès un salt indaûr di passe 10 agns: e je stade fintremai taiade la definizion dal ûs de lenghe furlane come di un dirit!

Il nestri interès nol è politic, ma al è chel di tecnics che a lavorin intal setôr de promozion linguistiche, cussients des problematichis che a son tal meti in vore lis normis di tutele, ma convints che si à di lâ indevant e no indaûr.
Ce che al à stât fat bon de Zonte regjonâl nol va ta chê direzion. Si trate di un pas indaûr rispiet ae leç statâl di tutele des minorancis linguistichis e ancje rispiet ae politiche europeane ta chest setôr.

Al è ancjemò timp par comedâ i erôrs fats e par chest e je bisugne che il Consei regjonâl al torni sul test de propueste fate indenant dai esperts. Al è impuartant l'impegn di ducj par lâ ta cheste direzion e par convinci i conseîrs regjonâi a cjapâ cheste strade.


Se cussì nol ves di jessi, al è ben che ancje lôr si visin che ca di cualchi mês si varà di lâ a votâ, e i furlans a varan di meti sul plat de belance ancje l'impegn che lis fuarcis politichis, sedi a centriçampe sedi a centridrete, a àn metût par difindi la lenghe furlane e dut il patrimoni plurilengâl, unic vêr element che al justifiche e che al fonde la specialitât de nestre regjon. Forsit lis elezions no si vincin dome cu la tutele linguistiche, ma i nestris politics a àn di rindisi cont che, cence i furlans e il furlan, al è facil pierdilis.

Alessandro Carrozzo, Sportellista di lingua friulana
Christian Romanini, Sportellista di lingua friulana
Elena Zanussi, Ex sportellista di lingua friulana
Federica Angeli, Sportellista di lingua tedesca
Federica Mecchia, Sportellista di lingua friulana
Isa Dorigo, Sportellista di lingua friulana
Laura G. Lazzara, Sportellista di lingua friulana
Lorena Zuccolo, Sportellista di lingua friulana
Maria Grazia Lacovig, Sportellista di lingua friulana
Maurizio Biasizzo, Sportellista di lingua friulana
Priscilla De Agostini, Sportellista di lingua friulana
Rosalba Della Pietra, Sportellista di lingua friulana
Rossella Malisan, Sportellista di lingua friulana
Sara Cuomo, Ex sportellista di lingua friulana
Sara Maieron, Sportellista di lingua friulana